朋友成日問，1988年第一屆叱吒樂壇流行榜頒獎典禮，Alan屈居男歌手銀獎，點睇。
可以點睇? 第二、三屆亦如是。商台是標榜最公正、最有權威性的。不是嗎? 播放率係公開的，你只需24小時聽住收音機就計算到，冇得呃人，所以係最公正的。當然，電台DJ播邊首歌的决定，會否受到高層指示所影響，抑或任何利害衝突，就不得而知了。
20 年前……都係先講2006年: 容祖兒、何韻詩、楊千嬅 - 大家各有三首冠軍歌，但只有楊千嬅取得叱吒十大(全年播放率最高10首歌曲)，卻屈居女歌手銅獎。似乎金銀銅只係決定於邊個出碟多，派台歌多，數量取勝。 Joey 去年出左三隻碟，派左十幾首歌上台，所以……講完。
1988年情況有些雷同。其實88年宣佈男歌手銀獎時，有講出 Alan有兩首冠軍作品(3星期冠軍80歲後、1星期冠軍半夢半醒)，反而Leslie只得一首冠軍歌，但派台作品比較多。半夢半醒、水中花、80歲後、不見不散可說是Massive Hit of the Year，流行程度只有莎利和慧嫻兩首可以緊隨。
4星期冠軍竟然輸比1星期? 冇錯，這只是一個數目鬥多的遊戲。Alan既然決定退出，派台歌數目刻意減少，而Leslie正於博殺時期，plug多些歌曲也是正常。再講，擁抱只 plug了80歲後和水中花兩首，因為Alan與寶記要投身為溫拿15週年做宣傳。叱吒是1988年3月尾才成立，Alan於年初兩首流行極品玩出火、半夢半醒已經接近水尾(慧嫻首傻女咪仲慘!)，而叱吒是計總播放次數的，Leslie明顯比較優勝 (仲有同阿Sam合唱既沈默是金)。那一年，Alan只係輸了Quantity，而不是Quality。仲記唔記得旗仔? Alan唔領獎，照計就唔會有Fans出席撑場，但代表Alan既黃色旗仔依然滿場飛…
睇番港台，Alan雖然唔攞獎，全年仍有4.2首冠軍歌(千載不變)，阿Lam有4首，Leslie則有3.5首。
叱吒頒獎典禮一向”重量不重質”，既然Alan無心戀戰，1989年寶記明顯放緩對Alan唱片的宣傳，尤其是忘情都市大碟(只催谷一首你知我知)。反觀 Leslie，全年推出三張唱片(更有一張告別大碟)，播放總次數勝出，十分合理。正如1990年倫永亮借助阿Mui同憶蓮的兩首合唱歌(幸好當年唔興用Featuring作綽頭)，加上你知道我在等你嗎等歌，奪得金獎力壓Alan。
講真，88年初Alan話左退出唔攞獎，就冇諗住霸住d獎(可見他明顯減少宣傳、刻意低調了)，商台扮公正頒個銀獎俾佢為乜? 想暗示佢走下坡? 雖然Alan退出競賽，但他在1988-1990的成績，可引証於迷惑、擁抱、夢幻舞台等勁賣大碟，或1989年開了三十九場的爆滿紅館的驕人紀錄。
1990 年初，香港電台某DJ訪問Alan，說: “Alan, 友台的頒獎典禮昨晚舉行，又把你排在第2位呀!” Alan的輕鬆回應令我衷心佩服: “冇所謂呀，舊年都係咁啦! 我都話左唔攞獎，佢地想點排都得。其實佢排我o係第幾都影響唔到我，又唔會排左第2位，令到我既唱片賣少D既，哈哈!” - 既然Alan毫不介意排名，作為Fans又何必替他不值呢? 難道想Alan被獎項永遠牽引著?
又講番2006年。其實係兩位男歌手，叱吒稀客劉華、克勤今年都獲獎，佢地Fans望穿秋水(其實克勤去年都有一首十大)。叱吒果然是公正的，好似讀書考試咁，一分耕耘一分收穫。他們付出過努力(一位歌頌天比高，另一位克不容緩拉闊音樂)，用努力換得回報，當然是最公正的，不是嗎?
